Abre as xanelas!

                                         Chegaches coa boca cosida
                                         e a luz exiliada dos ollos.
                                         Coas mans pintadas de brétema
                                         e a dor impresa nos xeonllos.

                                         Nun trono de sombras
                                         coroada de pedras.
                                         meniña descalza, coitada,
                                         fuxindo dos soños resgados.

                                         Arrinca as raíces noxentas
                                         que feren o teu corpo.
                                         Desata as cordas dos nocellos,
                                         deixa que corran as pernas.

                                        Abre as xanelas !
                                        Cando entre o sol gárdao na artesa.
                                        Enche as gretas de verbas, 
                                        fúndete núa nas mareas.

                                        E préndelle lume as serpes
                                        que che cuspiron na inocencia.

                                       Abre as xanelas!
                                                                 Aló no horizonte...
                                                                                              sorrí unha nena.

                                                                                     Asun Estévez (Noites, amenceres...e algo máis)